அமெரிக்கா - ஈரான் அமைதி ஒப்பந்தம் உடனடியாக கையெழுத்தாகாது: ஈரான் வெளியுறவு அமைச்சகம் விளக்கம்!

அமெரிக்கா மற்றும் ஈரான் இடையே கடந்த சில மாதங்களாக நீடித்து வரும் பதற்ற நிலையை தணிக்கும் நோக்கில் முன்னெடுக்கப்பட்டு வரும் அமைதிப் பேச்சுவார்த்தைகள் தொடர்பாக புதிய தகவல் வெளியாகியுள்ளது. இரு நாடுகளுக்கும் இடையிலான மோதலை முடிவுக்குக் கொண்டு வருவதற்காக தயாரிக்கப்பட்டு வரும் "இஸ்லாமாபாத் புரிந்துணர்வு ஒப்பந்தம்" திட்டமிட்டபடி ஞாயிற்றுக்கிழமை கையெழுத்தாகாது என ஈரான் வெளியுறவு அமைச்சகம் அதிகாரப்பூர்வமாக அறிவித்துள்ளது.

ஈரான் வெளியுறவு அமைச்சின் பேச்சாளர் இஸ்மாயில் பாகேய் வெளியிட்டுள்ள விளக்கத்தில், பாகிஸ்தானின் மத்தியஸ்தத்துடன் இடம்பெற்று வரும் பேச்சுவார்த்தைகள் இன்னும் இறுதிக்கட்ட முடிவை எட்டவில்லை என தெரிவிக்கப்பட்டுள்ளது. தற்போதைய பேச்சுவார்த்தைகளின் முக்கிய நோக்கம், இரு நாடுகளுக்கும் இடையே உருவாகியுள்ள மோதல் சூழ்நிலையை முடிவுக்குக் கொண்டு வந்து, நிலையான அமைதிக்கான அடித்தளத்தை அமைப்பதாகும் என்றும் அவர் குறிப்பிட்டுள்ளார்.

இதனுடன் தொடர்புபட்ட அணுசக்தி விவகாரங்கள் அல்லது யுரேனியம் செறிவூட்டல் தொடர்பான முக்கிய பிரச்சினைகள் குறித்து இக்கட்டத்தில் எந்தவிதமான கலந்துரையாடல்களும் இடம்பெறாது எனவும் அவர் தெளிவுபடுத்தியுள்ளார். முதற்கட்டமாக போர்நிறுத்தம் மற்றும் பதற்றத்தைக் குறைக்கும் நடவடிக்கைகளே கவனத்தில் கொள்ளப்படுவதாகவும் தெரிவிக்கப்பட்டுள்ளது.

ஒப்பந்தம் கையெழுத்தாகும் திகதி குறித்து ஊடகங்களில் பல்வேறு தகவல்கள் வெளியாகி வந்தாலும், அதுகுறித்து அதிகாரப்பூர்வ அறிவிப்பு வெளியாகும் வரை பொறுமையாக காத்திருக்க வேண்டும் என ஈரான் தரப்பு வலியுறுத்தியுள்ளது. குறிப்பாக, அமெரிக்காவின் நிலைப்பாடுகள் பல்வேறு கட்டங்களில் மாறுபட்டு வந்துள்ளதால், எதிர்கால அறிவிப்புகள் தொடர்பில் மிகுந்த எச்சரிக்கையுடன் செயல்பட வேண்டிய அவசியம் இருப்பதாகவும் இஸ்மாயில் பாகேய் தெரிவித்துள்ளார்.

இதற்கு முன்னதாக, அடுத்த 24 மணி நேரத்திற்குள் அமைதி ஒப்பந்தம் இறுதி செய்யப்படலாம் என பாகிஸ்தான் பிரதமர் நம்பிக்கை வெளியிட்டிருந்தார். எனினும், ஈரான் வெளியுறவு அமைச்சகத்தின் சமீபத்திய விளக்கம் காரணமாக, ஒப்பந்தம் குறித்த எதிர்பார்ப்புகள் தற்காலிகமாக பின்னுக்குத் தள்ளப்பட்டுள்ளன.

இருப்பினும், பேச்சுவார்த்தைகள் முற்றிலும் கைவிடப்படவில்லை என்றும், வரும் நாட்களில் சாதகமான முன்னேற்றங்கள் ஏற்படுவதற்கான வாய்ப்புகள் இன்னும் திறந்தே உள்ளதாகவும் ஈரான் தரப்பு சுட்டிக்காட்டியுள்ளது. மத்திய கிழக்கில் நிலவும் பதற்றத்தை குறைத்து, பிராந்திய அமைதியை உறுதிப்படுத்தும் முயற்சியாக இந்த பேச்சுவார்த்தைகள் உலக நாடுகளின் கவனத்தை ஈர்த்துள்ளன.